Një ngjarje tragjike ka ndodhur gjatë orëve të para të së mërkurës në zonën e Potamit, në Himarë, ku një elektricist ka humbur jetën në krye të detyrës. Viktima, Bashkim Boçi, pjesë e ekipeve të OSSH Elbasan, ishte angazhuar për riparimin e rrjetit elektrik, i cili ishte dëmtuar nga stuhitë dhe erërat e forta që përfshinë zonën.
Sipas të dhënave, ngjarja ka ndodhur rreth orës 03:00. Dyshimet paraprake sugjerojnë se punonjësi mund të jetë goditur nga rryma elektrike, ndërsa grupi hetimor ndodhet në vendngjarje për të zbardhur rrethanat e plota përmes ekspertizës teknike.
Ministri i Infrastrukturës dhe Energjisë, Enea Karakaçi, ka reaguar lidhur me humbjen e jetës së elektricistit, duke vlerësuar sakrificën dhe kontributin e tij shumëvjeçar. Në mesazhin e tij, ministri nënvizoi se Bashkim Boçi kishte shërbyer me përkushtim dhe profesionalizëm që prej vitit 2000. Institucionet kanë shprehur ngushëllimet për familjen dhe kolegët e të ndjerit, ndërkohë që policia po vijon punën për dokumentimin e plotë të rastit.
Përditësime
Elektricisti i OSHEE, Bashkim Boçi, ka humbur jetën në Himarë gjatë riparimit të një defekti në rrjetin elektrik. Boçi kishte udhëtuar nga Elbasani për të mbështetur ekipet lokale. Lidhur me ngjarjen, Ministri i Infrastrukturës dhe Energjisë, Enea Karakaçi, shprehu ngushëllimet për familjen, duke deklaruar se institucionet do të ofrojnë mbështetjen e plotë për ta në këto momente të vështira.