Deputetja e Partisë Demokratike të Kosovës, Eliza Hoxha, ka shprehur pritshmëritë e saj për pjesëmarrje masive në "Marshin për Liri", i planifikuar për datën 12 shtator. Ky marsh është organizuar në shenjë mbështetjeje për ish-krerët e UÇK-së, të cilët ndodhen në Hagë për procese gjyqësore.
Në një prononcim për emisionin "Info Magazine" në Klan Kosova, Hoxha ka vlerësuar rëndësinë e bashkimit të qytetarëve, pavarësisht përkatësive politike, gjinore, gjeografike apo kulturore, për të përcjellë mesazhin për drejtësi. Ajo u shpreh se beson në një pjesëmarrje të gjerë, ngjashëm me aktivitetet e kaluara të këtij karakteri.
Sipas Hoxhës, pjesëmarrësit do të kenë mundësi ta përçojnë mesazhin e tyre përmes pranisë fizike, si dhe përdorimit të pankartave dhe afisheve. Ajo theksoi se ky aktivitet shërben si një shprehje e dashurisë dhe e kërkesës për liri, duke shtuar se "liria nuk mund të burgoset" dhe se "çlirimtarët tanë e kanë vendin në shtëpinë e vet".
Në përfundim të deklaratës, Eliza Hoxha ka falënderuar të gjithë ata që kanë kontribuar në organizimin e këtyre aktiviteteve, duke përfshirë shoqatat e dala nga lufta dhe ish-të burgosurit politikë.