Përfaqësuesit e platformës qytetare Liria ka Emër, Ismail Tasholli dhe Eliza Hoxha, kanë zhvilluar një vizitë në selinë e Shoqatës së të Burgosurve Politikë, ku kanë diskutuar për përgatitjet e organizimit të Marshit për Liri. Ngjarja është parashikuar të zhvillohet më 12 shtator në Prishtinë, nën moton Kosova po pret.
Gjatë takimit, Tasholli dhe Hoxha u pritën nga kryetari i Shoqatës së të Burgosurve Politikë, Shefik Sadiku, kryetari i shoqërisë Lëvizja, Xhevat Gjini, si dhe nga anëtarë të kryesisë dhe anëtarësisë. Biseda u fokusua te mobilizimi qytetar për të mbrojtur vlerat e luftës së Ushtrisë Çlirimtare të Kosovës dhe për të shprehur mbështetje për udhëheqësit e saj, të cilët aktualisht po përballen me procese gjyqësore në Hagë.
Ismail Tasholli nënvizoi se mbështetja nga ish-të burgosurit politikë mban një peshë të veçantë, duke theksuar se këta njerëz e dinë më mirë se kushdo tjetër vlerën e lirisë. Nga ana e saj, Eliza Hoxha kërkoi që ky marsh të shndërrohet në një zë të unifikuar qytetar, i cili tejkalon përkatësitë partiake në funksion të drejtësisë dhe dinjitetit historik të Kosovës.
Kryetari i Shoqatës së të Burgosurve Politikë, Shefik Sadiku, konfirmoi mbështetjen e plotë për këtë nismë, duke u bërë thirrje qytetarëve për pjesëmarrje masive. I të njëjtit mendim ishte edhe kryetari i shoqërisë Lëvizja, Xhevat Gjini, i cili potencoi përgjegjësinë e brezave aktualë për ta mbrojtur të vërtetën e luftës çlirimtare dhe për ta përcjellë atë tek gjeneratat e ardhshme.
Në fund të takimit, organizatat konfirmuan zyrtarisht pjesëmarrjen e tyre në marshimin që pritet të bashkojë të gjithë ata që kërkojnë kthimin e çlirimtarëve në vendin e tyre.