Një emigrant shqiptar 53-vjeçar ka humbur jetën mëngjesin e së enjtes në Ankona të Italisë, pasi u godit nga një tren në stacionin e linjës Pescara-Milano.
Ngjarja ndodhi rreth orës 07:00. Viktima, që jetonte në Merano, nuk është identifikuar ende zyrtarisht. Një dëshmitar deklaroi se e pa burrin duke u hedhur qëllimisht në shina pak para se të afrohej treni i shpejtësisë së lartë Frecciarossa nga jugu.
Në vendngjarje ndërhynë policia hekurudhore dhe zjarrfikësit, por nuk arritën ta shpëtonin. Hetimet vazhdojnë për të sqaruar rrethanat. Sipas raporteve fillestare, dyshohet për akt të vetëdijshëm, por nuk përjashtohet aksidenti ose problemet shëndetësore.
Për shkak të incidentit, qarkullimi i trenave në linjën Adriatike u ndërpre për disa orë, por më pas rifilloi normalisht.
Përditësime
Ngjarja ndodhi në orën 07:14 në binari nr. 1, përballë hyrjes kryesore të stacionit të Ankonës.
Treni kishte nisur nga Pescara në orën 06:00 drejt Milano Centrale, me mbërritje të paraparë në 11:10.