Kursi i këmbimit euro-lek ka arritur nivelin më të ulët të të gjitha kohërave, 95.49 lekë për një euro, sipas të dhënave zyrtare të Bankës së Shqipërisë. Kjo rënie është regjistruar gjatë kësaj jave, duke thelluar trendin nënçmues të monedhës europiane.
Kursi ka rënë me 1.3% që nga fillimi i 2026-s dhe me 3.3% krahasuar me të njëjtën periudhë të vitit të kaluar. Agjentët e tregut valutor e lidhin këtë zhvillim me presionet e tremujorit të dytë, kryesisht për shkak të efektit rritës të turizmit, si dhe ofertës së lartë të valutës dhe kërkesës së dobët për të.
Forcimi i lekut ka marrë hov të ri gjatë 2026-s, veçanërisht në tremujorin e parë, një dinamikë jo e zakonshme në të dhënat historike. Banka e Shqipërisë ka ndërhyrë rregullisht duke blerë euro në tregun valutor, por nuk ka arritur të ndalojë plotësisht rënien graduale.
Vitin e kaluar, Banka e Shqipërisë bleu 1 miliard e 27 milionë euro, me rritje 10% krahasuar me vitin paraardhës. Këto blerje synonin rritjen e rezervës valutore dhe frenimin e forcimit të lekut, duke përfshirë operacionet e planifikuara dhe ndërhyrjet direkte në treg.
Për këtë vit, banka parashikon të blejë 330-450 milionë euro përmes ankandeve në tregun e brendshëm, për të forcuar rezervat valutore. Këto operacione kanë rritur ofertën monetare të lekut me ritme të larta në fund të 2025-s dhe fillimin e 2026-s.