Eurodeputeti çek, Tomáš Zdechovský, ka reaguar ashpër ndaj deklaratës së ministres serbe të Administratës Publike dhe Vetëqeverisjes Lokale, Snezhana Paunoviç, lidhur me çështjen e Kosovës. Sipas tij, retorika e përdorur nga ministrja serbe është e papranueshme dhe bie ndesh me parimet themelore të Bashkimit Evropian.
Në reagimin e tij, Zdechovský deklaroi se, nëse ministrja vazhdon të mbajë këtë qëndrim, institucionet evropiane duhet të shqyrtojnë përjashtimin e Serbisë nga procesi i negociatave për anëtarësim. Ai e krahasoi retorikën e saj me relativizimin e krimeve naziste pas Luftës së Dytë Botërore, duke e cilësuar këtë si një vijë të kuqe për çdo vend që aspiron të jetë pjesë e bllokut evropian.
“Isha plotësisht i shokuar nga ajo që dëgjova nga ministrja e Serbisë. Nuk ishte vetëm tronditje, por diçka krejtësisht e papranueshme. Nëse kjo grua është vërtet ministre, ne duhet ta nxjerrim Serbinë nga negociatat”, u shpreh eurodeputeti çek. Ai shtoi se Bashkimi Evropian duhet të dërgojë një mesazh të qartë se retorika e tillë nuk gjen vend brenda strukturave të tij.
Kjo deklaratë vjen pas reagimeve të shumta ndërkombëtare ndaj Paunoviçit, për shkak të qëndrimeve të saj të shprehura lidhur me situatën në Kosovë, të cilat janë cilësuar nga kritikët si nacionaliste dhe nxitëse.
Përditësime
Ministrja e Drejtësisë, Albulena Haxhiu, ka ushtruar kallëzim penal ndaj deputetes serbe Snezhana Paunoviç, pas deklaratave të kësaj të fundit se do të kishte kryer spastrim etnik në Kosovë po të kishte pasur kompetencat e Sllobodan Millosheviçit. Në lidhje me këtë rast:
- Eurodeputeti Tomáš Zdechovský e ka dënuar retorikën, duke e krahasuar atë me politikat e Adolf Hitlerit dhe tmerret e Aushvicit.
- Grupi Parlamentar 'Lëvizja e Qytetarëve të Lirë – SDA e Sanxhakut' dhe Partia për Veprim Demokratik kanë kërkuar shkarkimin e Paunoviçit nga detyrat e saj funksionale.