Familja Muçaj rrëfyen për Top Channel dhimbjen pas vdekjes së 13-vjeçarit Enea Muçaj dhe shokut të tij Klesi në aksidentin rrugor në Durrës. Ngjarja ndodhi ndërsa fëmijët po shijonin një akullore. Me ta ishte edhe Arbioni, 8-vjeç, djali i hallës së Eneas, i cili sot iu nënshtrua një operacioni tjetër në Spitalin e Traumës.
Babai Ermal Muçaj shprehu dhimbjen e thellë: "Ikja, lëvizja, tani më preu krahët. Këto ditë i kaloj se kur dal në çdo cep më duket sikur më thërret: ‘o babi, po pse s’më merr?’. Do vij o babi, i them, do vij." Ai theksoi se Enea kishte ëndrra të mëdha. Fëmija ishte entuziast për udhëtimin me klasën në Vlorë këtë të premte dhe kishte pasion për futbollin. "E shihja e buzëqeshte e i thosha ‘He merr bab do ti ngjash babit?’. ‘Po’ më thoshte. ‘Do bëj profesionalen, do vij me ty të ndihmoj’ thoshte. Mekanik… Ishte shumë i pasionuar", tha ai.
Sipas familjarëve, aksidenti ishte i paralajmëruar, por jo i parandaluar. Ata kishin mbledhur 100 firma dhe telefonata nga banorët e lagjes për autorin e dyshuar, i cili lëvizte në mënyrë të pakontrollueshme. "Kishim muaj e muaj që merrnim tabulatet, telefonatat nga gjithë banorët e lagjes. Edhe policia vinte, qeshte… një gjë qesharake", deklaroi Muçaj. Ai akuzoi policinë për neglizhencë dhe mungesë sigurie rrugore: "Ishte i përditshëm. Ecte në mënyrë të pakontrollueshme, por policët e lanë, pinin kafe dhe kthenin fletën." Familjarët kërkojnë drejtësi.