Një ngjarje e rëndë ka tronditur familjen shqiptare Manati, e cila jeton në Jacksonville të Floridës. Mëngjesin e datës 26 gusht, banesa e tyre u përfshi nga flakët, duke shkaktuar humbjen tragjike të jetës së tre fëmijëve të familjes: dy binjakëve 11-vjeçarë dhe një fëmije 2-vjeçar. Pjesëtarët e tjerë të familjes, prindërit si dhe një foshnjë 2-muajshe e një fëmijë 9-vjeçar, fatmirësisht mbijetuan, por po trajtohen në spital në gjendje shëndetësore kritike.
Daja i fëmijëve, në një rrëfim për emisionin “Me Zemër të Hapur”, deklaroi se shkaku i zjarrit dyshohet të ketë qenë një lodër e fëmijëve, bateria e së cilës ka shpërthyer gjatë natës ndërsa ishte në karikim. I afërmi i viktimave shprehu dhimbjen e madhe për humbjen e nipërve, të cilët, për shkak të emigrimit, nuk kishte pasur mundësi t'i takonte asnjëherë që prej lindjes së tyre. Ai theksoi se aktualisht po bëhen përgatitjet për udhëtimin drejt SHBA-së.
Lidhur me gjendjen e të mbijetuarve, daja tregoi se motra e tij, nëna e fëmijëve, ndodhet në gjendje shumë të rënduar psikologjike dhe për shkak të traumës së thellë nuk ka qenë e mundur të realizohet një komunikim me të. Ai shtoi se nënën e fëmijëve e terrorizon sidomos ardhja e errësirës. Lajmin e hidhur për tragjedinë, ai u shpreh se e kishte marrë nga xhaxhai i tij.