Tragjedi në Florida, tre fëmijë shqiptarë humbin jetën nga zjarri

Një tragjedi e rëndë ka goditur familjen e Gentian Manatit, me origjinë nga Lushnja, pasi një zjarr i fuqishëm përfshiu banesën e tyre dykatëshe në orët e para të mëngjesit të 26 gushtit 2026 në Jacksonville, Florida. Nga kjo ngjarje fatkeqe, tre fëmijë të mitur humbën jetën, ndërsa dy të rritur dhe dy fëmijë të tjerë janë shtruar në spital në gjendje kritike për jetën.

Sipas shefit të Departamentit të Zjarrfikësve dhe Shpëtimit të Jacksonville, Percy Golden, alarmi për zjarrin u dha në orën 05:13. Ekipet e shpëtimit mbërritën në vendngjarje brenda katër minutash, duke gjetur flakë të fuqishme në katin e parë dhe tym të dendur në katin e dytë. Dy të rritur dhe dy fëmijë kishin arritur të dilnin nga ndërtesa përpara mbërritjes së zjarrfikësve, të cilët më pas gjetën tre fëmijët e tjerë pa shenja jete. Sipas dëshmive, disa banorë të zonës ndihmuan në nxjerrjen e një të rrituri dhe një foshnjeje nga dritarja e katit të dytë.

Familja Manati, ish-banore e lagjes "18 Tetori" në Lushnjë, ishte zhvendosur në Shtetet e Bashkuara përmes lotarisë amerikane. Më vonë, atyre u ishin bashkuar edhe prindërit e Gentianit, Njazi dhe Alia. Ngjarja ka shkaktuar tronditje të thellë te të afërmit dhe fqinjët në qytetin e Lushnjës. Dy motrat e Gentian Manatit kanë udhëtuar drejt SHBA-së për të mbështetur familjarët në këto momente të vështira.

Autoritetet amerikane po vijojnë hetimet për të përcaktuar shkakun e zjarrit, i cili mbetet ende i panjohur. Për të përballuar shpenzimet e funeralit dhe trajtimin mjekësor, një kushërirë e familjes ka hapur një fushatë në platformën GoFundMe. Kryqi i Kuq Amerikan është angazhuar për të asistuar familjet e tjera që u detyruan të zhvendosen për shkak të dëmeve në banesat fqinje.