Një tragjedi e rëndë ka goditur një familje shqiptare në Jacksonville të Floridës, ku tre fëmijë kanë humbur jetën nga një zjarr që përfshiu banesën e tyre. Viktimat janë dy vëllezër binjakë rreth 10-vjeçarë dhe një fëmijë tjetër 2-vjeçar, të gjithë pjesëtarë të familjes Manati.
Prindërit, Gent dhe Albana Manati, si dhe dy fëmijët e tjerë të familjes, kanë mundur të dalin nga banesa, por kanë pësuar lëndime serioze. Ngjarja ka shkaktuar reagime të shumta në komunitetin shqiptar në zonë, ku janë iniciuar thirrje për solidaritet dhe mbështetje ndaj çiftit Manati në këtë kohë të vështirë.
Autoritetet lokale kanë nisur hetimet për të zbardhur shkaqet dhe rrethanat e zjarrit, të cilat mbeten ende të paqarta. Në pamjet e publikuara nga agjencia Reuters, janë parë gjyshërit e fëmijëve të ndjerë, Alia dhe Artan Sulollari (të njohur edhe si Sulovari), të cilët kanë qenë të pranishëm pas incidentit. Policia vijon veprimet për të përcaktuar me saktësi shkaktarin e flakëve në banesë.