Programi i Ministrisë së Punës dhe Familjes për subvencionimin e faturave të energjisë elektrike synon të lehtësojë barrën financiare të familjeve në Kosovë. Disa qytetarë thonë se nuk kanë marrë përgjigje pas aplikimit, ndërsa të tjerë nuk kanë informacion të mjaftueshëm për mënyrën e përfitimit.
Fevzi Hashani, pensionist nga Obiliqi që punon edhe si taksist për të ndihmuar familjen, tha se ka aplikuar për subvencion për dy vjet radhazi, por nuk ka përfituar dhe nuk i është shpjeguar arsyeja. Ai tha se merr 239 euro pension. Hashani kërkoi lehtësira përmes çmimit të energjisë, duke argumentuar se vështirësitë ekonomike prekin një pjesë të gjerë të qytetarëve, jo vetëm kategori të caktuara.
Alush Llumnica tha se kishte dëgjuar për programin, por nuk kishte informacion të mjaftueshëm. Ai kërkoi ndihmë për familjet përballë faturave dhe çmimeve të larta. Rabit Krasniqi tha se nuk kishte parë njoftim për programin dhe nuk e dinte se ekzistonte një platformë aplikimi.
Ministria bën të ditur se përfituesit do të përzgjidhen sipas kritereve të përcaktuara në thirrjen për aplikim. Subvencioni do të jetë nga 5 deri në 50 euro në muaj, në varësi të nevojave të familjes. Sipas kritereve, të ardhurat mesatare mujore për secilin anëtar të ekonomisë familjare gjatë 12 muajve të fundit nuk duhet të kalojnë 150 euro.
Ministri i Punës, Familjes dhe Vlerave të Ushtrisë Çlirimtare të Kosovës, Andin Hoti, tha se për vitin e ardhshëm janë paraparë 15 milionë euro për subvencionimin e familjeve në nevojë. Numri i përfituesve të ardhshëm nuk dihet ende dhe do të përcaktohet pasi të miratohen subvencionet. Sipas Hotit, vitin e kaluar përfituan rreth 100 mijë qytetarë.
Profesori i ekonomisë Fidan Qerimi tha se përzgjedhja duhet të bëhet me kujdes dhe se familjet nuk duhet të përjashtohen për arsye administrative. Ai vuri në dyshim nëse subvencionimi mund të shërbejë si zgjidhje afatgjatë. Qytetarët kërkojnë më shumë informacion dhe transparencë për përzgjedhjen, si dhe lehtësira për përballimin e faturave të energjisë elektrike.