"Fantazma e Prishtinës" është bërë fenomen në rrjetet sociale gjatë ditëve të fundit. Ky personazh, i krijuar me inteligjencë artificiale (AI), shfaqet me një maskë të bardhë në fytyrë dhe këmbë dhie, duke u vendosur virtualisht në komuna të ndryshme të Kosovës. Tendenca ka nisur në Prishtinë dhe ka zgjeruar ndikimin në të gjithë vendin, duke krijuar kureshtje, humor dhe në disa raste konfuzion te qytetarët.
Qytetarët e thjeshtë dhe figura publike kanë kontribuar në përhapjen e këtij trendi përmes postimeve humoristike, memeve dhe montazheve. Personazhi paraqitet në mënyra kreative dhe qesharake, duke u integruar në ambiente të përditshme. Kjo ka bërë që “Fantazma” të bëhet virale, duke tërhequr reagime të shumta në platforma si Facebook.
Një nga reagimet më të vëmendura vjen nga aktori Fatmir Spahiu, i cili në një “story” në Facebook ka shkruar mbi një fotografi të personazhit: “Edhe qeky na u desht”. Autori i emisionit Debat Plus, Ermal Panduri, ka postuar: “Sonte në Debat Plus zbardhet misteri”. Gazetarja Ardiana Thaçi ka thënë me humor se ka zhvilluar një intervistë ekskluzive me të. Këto reagime kanë shtuar në popullaritetin e fenomenit, duke e kthyer në një temë diskutimi të gjerë.