Byroja Federale e Hetimit (FBI) njoftoi kthimin e 48 objekteve të lashta egjiptiane në vendin e tyre të origjinës. Operacioni u ndërmor nga Ekipi i Krimit Kundër Artit pranë këtij institucioni. Koleksioni i riatdhesuar përbëhet nga artefakte të ndryshme, si figurina, amuleta dhe pajisje varresh, të cilat u përkasin periudhave historike faraonike, romake dhe kopte.
Ndihmësdrejtori i FBI-së, Patrick Grandy, vlerësoi rëndësinë e këtyre objekteve, duke i cilësuar ato si pjesë të paçmueshme të historisë së pasur të Egjiptit. Nga ana tjetër, agjenti special Allen Grove bëri të ditur se hetimet vazhdojnë për të zbardhur rrjetin e mundshëm të trafikimit. Megjithëse trafikanti kryesor i dyshuar ka ndërruar jetë, autoritetet po punojnë për të identifikuar bashkëpunëtorët e tij. Gjithashtu, hetuesit kanë shprehur dyshime se mund të ketë ende sende të tjera të trafikimit që nuk janë zbuluar deri më tani.