Policia e Shtetit ka çmontuar një rrjet kriminal të angazhuar në trafikimin dhe tregtimin e sendeve me vlerë, të dyshuara si të vjedhura jashtë territorit të Shqipërisë. Operacioni i koduar "Stolen Gold", i udhëhequr nga Seksioni për Hetimin e Krimeve Ekonomike dhe Financiare në Drejtorinë Vendore të Policisë Fier, çoi në prangosjen e shtetasit D. S., 27 vjeç, banues në fshatin Kreshpan, ndërsa vijojnë kërkimet për një 45-vjeçar, të identifikuar si B. A., banues në fshatin Kraps.
Sipas hetimeve, autorët siguronin bizhuteri ari e argjendi, ora të markave luksoze dhe objekte të tjera me vlerë në Itali dhe Greqi, të cilat futeshin kontrabandë në vend për t'u tregtuar në subjekte argjendarie në Fier dhe Lushnjë. Gjatë kontrolleve në banesat e të dyshuarve, përveç sendeve me vlerë, u gjetën edhe fishekë arme gjahu dhe një shkop gome.
Në lidhje me këtë veprimtari, policia ka proceduar penalisht në gjendje të lirë shtatë administratorë argjendarish, të cilët akuzohen për blerje dhe tregtim të mallrave pa dokumentacion ligjor të origjinës. Të proceduarit janë:
• D. H. (45 vjeç), E. Gj. (38 vjeç) dhe A. Sh. (35 vjeç) nga Fieri
• M. S. (39 vjeç), A. K. (62 vjeç), B. B. (65 vjeç) dhe J. D. (41 vjeçe) nga Lushnja
Sendet e sekuestruara përfshijnë:
• 15 kg e 259 gramë ar
• 4 kg e 281 gramë argjend
• 612 ora të markave të ndryshme
• 13 varëse me gurë diamanti
• Sende të dyshuara me vlerë artistike e kulturore, para në lekë e euro, si dhe pajisje teknike (celularë e DVR).
Vlera paraprake e mallrave të konfiskuara nga autoritetet vlerësohet në rreth 2 milionë euro.