Ministri i Drejtësisë i Maqedonisë së Veriut, Igor Filkov, reagoi ndaj protestave dhe debatit publik për kërkesat që provimi i jurisprudencës të jepet në gjuhën shqipe. Ai i cilësoi këto kërkesa si përpjekje për presion politik dhe nxitje të konfrontimit etnik.
Sipas ministrit, provimi i jurisprudencës nuk është çështje politike, por proces profesional i bazuar në ekspertizë dhe respekt për rendin juridik të shtetit. Filkov theksoi se përpjekjet për ta paraqitur detyrimin për njohjen e gjuhës maqedonase si diskriminim janë manipulim i rrezikshëm i opinionit publik dhe goditje ndaj rendit kushtetues.
Ai shtoi se gjuha maqedonase është gjuha zyrtare në të gjithë territorin e Republikës së Maqedonisë së Veriut dhe themeli i sistemit institucional dhe ligjor. Filkov deklaroi se çështja është e mbyllur dhe se provimi zhvillohet vetëm sipas ligjeve dhe standardeve profesionale, pa ndikimin e presioneve politike apo protestave.
Ministri u shpreh se Ministria e Drejtësisë mbetet e hapur për dialog institucional, por nuk do të lejojë cenimin e sistemit gjyqësor apo të rolit të gjuhës maqedonase në shtet.
Përditësime
Mijëra protestues u mblodhën pranë Urit të Gurit në Shkup dhe kërkuan dorëheqjen e ministrit Igor Filkov dhe kryeministrit Hristijan Mickoski. Ata valëviten flamuj shqiptarë, skanduan "Gjuha shqipe nuk negociohet" dhe, sipas organizatorëve, protestuan kundër fshehjes së gjuhës shqipe nga institucionet dhe sistemi i drejtësisë.