Specialistët e Seksionit për Hetimin e Krimeve Ekonomike, në bashkëpunim me shërbimet e Komisariatit të Policisë Divjakë, finalizuan operacionin policor të koduar "Game Over", duke goditur një rast të organizimit të paligjshëm të lojërave të fatit. Aksioni u zhvillua pas kontrolleve në një lokal në fshatin Karavasta e Re.
Në pranga ka rënë pronari i lokalit, shtetasi Altin Çoku, 52 vjeç, dhe kamarieri Edmir Çela, 35 vjeç. Sipas njoftimit zyrtar, ambienti ishte përshtatur posaçërisht për zhvillimin e basteve sportive nëpërmjet përdorimit të kompjuterëve dhe pajisjeve celulare. Gjatë kontrollit të kryer në aparatin celular të 35-vjeçarit, u gjetën faqe të ngjashme me platformat e basteve sportive.
Veç aktivitetit të paligjshëm të lojërave të fatit, verifikimet e kryera nga uniformat blu treguan se punonjësi Edmir Çela ishte i punësuar në mënyrë të paligjshme, pasi nuk rezultonte i regjistruar pranë institucioneve shtetërore përkatëse.
Në cilësinë e provës materiale, policia sekuestroi pajisjet e mëposhtme:
• 5 njësi kompjuterike;
• 1 laptop;
• 1 pajisje regjistrimi dixhital (DVR);
• 5 telefona celularë.
Materialet procedurale janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Fier, e cila do të vazhdojë hetimet për dokumentimin e plotë të kësaj veprimtarie dhe verifikimin e përfshirjes së mundshme të personave të tjerë.