Strukturat e Drejtorisë Vendore të Policisë Tiranë kanë ndërmarrë një aksion kundër ushtrimit të paligjshëm të lojërave të fatit, duke goditur tri raste të ndryshme në kryeqytet. Në kuadër të operacionit “Last Bet”, autoritetet kanë sekuestruar provat materiale që përfshijnë makineta, çipsa, letra bixhozi dhe 5 telefona celularë.
Në rrugën “Aleks Çaçi”, efektivët e Komisariatit të Policisë Nr. 1 arrestuan shtetasin G. Zh., 22 vjeç, ndërsa shpallën në kërkim M. Zh., 50 vjeç, dhe A. Zh., 25 vjeç. Në ambientin e marrë me qira nga këta persona, policia gjeti 2 makineta për lojëra fati, një tavolinë pokeri, çipsa dhe letra bixhozi.
Në zonën e Bathores, specialistët e Komisariatit të Policisë Nr. 5 arrestuan shtetasin G. S. (J.), 39 vjeç, pasi në lokalin që administronte u gjetën një makinetë dhe një celular. Ndërkohë, në një lokal në rrugën “Irfan Tomini”, Seksioni për Hetimin e Krimeve Kibernetike nisi procedimin penal për katër shtetas: S. G. (21 vjeç), O. C. (19 vjeç), R. H. (27 vjeç) dhe F. D. (67 vjeç). Atyre iu gjetën telefona celularë që dyshohet se përdoreshin për organizimin e basteve sportive.
Materialet hetimore i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë për veprime të mëtejshme.