Operacioni policor i koduar “No Games” çoi në arrestimin e dy shtetasve në qytetin e Fierit, të cilët akuzohen për organizimin e lojërave të fatit në kundërshtim me ligjin. Ndërhyrja u krye nga shërbimet e Komisariatit të Policisë Fier në bashkëpunim me Forcën e Posaçme “Shqiponja”, pas informacioneve të siguruara në rrugë operative për zhvillimin e kësaj veprimtarie në një lokal në lagjen “Kastriot”.
Në pranga ranë organizatori i dyshuar, Rudenc Cenko, 43 vjeç, banues në Tiranë, si dhe administratorja e lokalit, Dhurata Sherifaj, 49 vjeçe, banuese në Fier. Gjatë kontrollit në ambientet e lokalit, policia gjeti një dhomë të posaçme të përshtatur për lojëra fati, ku u gjetën në flagrancë duke luajtur 16 shtetas të tjerë. Për këta të fundit ka nisur procedimi penal në gjendje të lirë.
Në cilësinë e provës materiale, autoritetet sekuestruan:
• 1 tavolinë pokeri
• 500 çipsa
• 6 pako me letra bixhozi
• 5 telefona celularë
• 8 000 euro
Materialet procedurale janë referuar për veprime të mëtejshme në Prokurorinë pranë Gjykatës së Shkallës së Parë të Juridiksionit të Përgjithshëm Fier. Personat e proceduar penalisht janë banues në Fier, Tiranë, Durrës, Korçë dhe Berat.