Policia e Tiranës ka vazhduar kontrollet në lokale dhe subjekte të ndryshme, duke zbuluar dy ambiente ku dyshohej se organizoheshin lojëra fati në kundërshtim me ligjin.
Në kuadër të operacionit policor të koduar “Fati i lojërave”, specialistët për Hetimin e Krimeve të Komisariateve të Policisë Nr. 3 dhe Nr. 4 arrestuan një administrator dhe proceduan penalisht një tjetër.
Në rastin e parë, në një lokal në rrugën “Sitki Çiço”, u arrestua shtetasi E. H., 39 vjeç, pasi u konstatua se kishte përshtatur ambientin për organizimin e lojërave të fatit. Gjatë kontrollit, policia sekuestroi dy tavolina pokeri si prova materiale.
Në rastin e dytë, shtetasi E. C., 55 vjeç, u procedua penalisht, pasi në lokalin që administronte, gjatë verifikimit të telefonit të tij, u gjetën aplikacione për baste sportive.
Policia njofton se kontrollet dhe hetimet për goditjen e kësaj veprimtarie të paligjshme do të vazhdojnë në të gjithë Tiranën. Materialet procedurale i janë referuar Prokurorisë së Tiranës për veprime të mëtejshme.