Sipas një analize të publikuar nga Euronews bazuar në të dhënat e FMN-së, ekonomitë e Ballkanit Perëndimor, përfshirë Kosovën, parashikohet të performojnë më mirë se vendet e zhvilluara të Evropës gjatë pesë viteve të ardhshme. Ndërsa Bashkimi Evropian si tërësi parashikohet të rritet me një mesatare prej 1.4 për qind në vit, ekonomia e Kosovës pritet të mbajë një ritëm prej rreth 4 për qind.
Faktorët kryesorë që do të mbështesin këtë rritje janë:
• Kërkesa e brendshme dhe konsumi familjar;
• Investimet publike në infrastrukturë;
• Remitancat nga diaspora, veçanërisht nga Gjermania dhe Zvicra;
• Një fuqi punëtore relativisht e re.
FMN vë në dukje se Evropa në përgjithësi përballet me sfida strukturore, si borxhi i lartë publik, plakja e popullsisë, produktiviteti i ulët dhe kostot e larta të energjisë, të cilat do ta mbajnë rritjen ekonomike të eurozonës nën nivelet historike deri në vitin 2031. Në raport theksohet se për të siguruar një zhvillim të qëndrueshëm, vendet e rajonit duhet të forcojnë financat publike dhe të investojnë më shumë në arsim e inovacion, duke synuar kalimin nga një rritje e mbështetur te konsumi drejt një rritjeje të bazuar në produktivitet.
Ministri në detyrë i Financave, Hekuran Murati, përmes një njoftimi në rrjetet sociale, theksoi se këto projeksione rikonfirmojnë perspektivën e mirë të rritjes ekonomike për vendin në vitet në vijim.