Ministri i Financave, Petrit Malaj, priti një delegacion të Fondit Monetar Ndërkombëtar (FMN), të kryesuar nga Ian Hawkesworth, për të diskutuar gjetjet e raportit mbi eficiencën e investimeve publike, të njohur si PIMA. Gjatë takimit u evidentua progresi që Shqipëria ka shënuar vitet e fundit në planifikimin dhe administrimin e fondeve buxhetore.
Investimet publike në vend kanë zënë rreth 6,5% të PBB-së gjatë viteve të fundit dhe parashikimet afatmesme tregojnë se ato do të ruajnë nivele të larta, duke mbështetur procesin e integrimit në Bashkimin Evropian. Ministri Malaj deklaroi se këto rezultate tregojnë se Shqipëria po performon në përputhje me standardet e ekonomive të zhvilluara. Sipas tij, ky progres reflektohet në rritjen e disiplinës buxhetore, alokimin më të mirë të fondeve, si dhe në përmirësimin e transparencës dhe konkurrueshmërisë në proceset e prokurimit publik.
Duke iu referuar investimeve në sektorë si transporti, energjia, digjitalizimi dhe shëndetësia, ministri nënvizoi se qëllimi kryesor mbetet gjenerimi i vlerës së shtuar për çdo lek të shpenzuar. Në një reagim në rrjetet sociale, Malaj theksoi se vlerësimi PIMA tregon se vendi po performon mbi mesataren e ekonomive evropiane. Pavarësisht vlerësimit pozitiv, objektivi i qeverisë mbetet vijimi i reformave për të garantuar që investimet publike të përkthehen në shërbime më cilësore për qytetarët.