Ujërat e Gjirit të Orikumit janë bërë strehë për një nga gjitarët detarë më të rrallë dhe më të rrezikuar në botë, fokën Monaka mesdhetare. Gjatë ditëve të fundit, kjo specie është vërejtur disa herë pranë bregut, duke tërhequr vëmendjen e banorëve, vizitorëve dhe operatorëve turistikë në zonë.
Ekspertët dhe vëzhguesit lokalë theksojnë se shfaqja e saj është një tregues i rëndësishëm i cilësisë së ekosistemit detar në hapësirën e Parkut Detar të Karaburunit dhe Sazanit. Ky mjedis ofron kushtet e nevojshme natyrore për jetesën e fokës, duke i mundësuar asaj të ushqehet dhe të pushojë në një ambient të qetë, larg zhurmës dhe ndotjes urbane.