Pas shpalljes së aktgjykimit ndaj katërshes së UÇK-së nga Gjykata Speciale në Hagë, një numër i madh qytetarësh janë mbledhur në sheshet e Prishtinës. Pas këtij zhvillimi, qytetarët janë drejtuar për te baza kryesore e EULEX-it, e cila ndodhet në Zonën Industriale të kryeqytetit.
Si kundërpërgjigje, Njësia Speciale e Policisë së Kosovës është vendosur para hyrjes së objektit, duke krijuar një kordon sigurie. Sipas raportimeve, prania e zyrtarëve policorë është e shtuar dhe ka për qëllim parandalimin e eskalimit të situatës gjatë protestës së qytetarëve që kanë ardhur nga sheshi "Skënderbeu".
Në vendngjarje shihet një mobilizim i konsiderueshëm i forcave të rendit, të cilat kanë rrethuar objektin e misionit për të siguruar perimetrin e ndërtesës. Qytetarët vazhdojnë të qëndrojnë në afërsi të bazës së EULEX-it, ndërsa situata monitorohet vazhdimisht nga policia e pranishme në terren.
Përditësime
Gjykata Speciale ka shpallur dënimet për ish-krerët e UÇK-së: Hashim Thaçi dhe Jakup Krasniqi janë dënuar me nga 25 vjet burgim, Kadri Veseli me 18 vjet, ndërsa Rexhep Selimi me 13 vjet. Protestat janë zgjeruar edhe në Fushë-Kosovë, ku forcat policore janë pozicionuar te zyrat e EULEX-it. Policia e Kosovës raporton se situata është qetësuar dhe deri më tani nuk ka pasur asnjë arrestim.