Ky artikull është përditësuar. Shiko përditësimet
Forcat e Armatosura të Shqipërisë vijojnë angazhimin në terren për të menaxhuar situatën e krijuar nga reshjet intensive të shiut që kanë shkaktuar përmbytje në disa zona të vendit. Efektivët e Komandës Mbështetëse dhe Regjimentit të Këmbësorisë së Jugut të Forcës Tokësore janë të dislokuar në zonat e prekura, me fokus kryesor mbrojtjen e jetës së qytetarëve dhe menaxhimin e situatave emergjente.
Aktualisht, janë angazhuar mbi 155 efektivë, 37 mjete dhe 7 motopompa në qarqet Vlorë, Fier, Durrës dhe Gjirokastër, si dhe në zona të tjera ku ka qenë e nevojshme ndërhyrja. Të gjitha veprimet zhvillohen nën koordinimin e Agjencisë Kombëtare të Mbrojtjes Civile, me qëllim garantimin e sigurisë së banorëve dhe mbajtjen e situatës nën kontroll.
Në detajet specifike të angazhimit:
• Në Vlorë: 37 efektivë, 4 mjete, 3 gomone dhe një ambulancë me 2 efektivë mjekësorë.
• Në Durrës: 61 efektivë, 17 mjete, 5 gomone dhe 7 agregate motopompa, prej të cilave 4 me fuqi të lartë thithëse, 1 me fuqi të mesme dhe 2 me fuqi të vogël.
• Në Gjirokastër: 27 efektivë dhe 4 mjete.
• Në zonën e urës së Mifolit në fshatin Ferras të Fierit: 23 forca, 34 mjete dhe 1 motovarkë.
• Në Kurbin: Një operacion xhenierik për pastrimin e rrugëve me 3 efektivë dhe 2 mjete.
Këto ndërhyrje synojnë të sigurojnë ndihmë të menjëhershme për qytetarët e prekur dhe të parandalojnë rreziqe të mëtejshme nga përmbytjet.
Përditësim
Forcat e Armatosura kanë angazhuar 9 efektivë në fshatin Obot të Shkodrës, së bashku me 2 mjete dhe 1 varkë, për të ndihmuar në evakuime dhe shpëtimin nga përmbytjet.
Në Gjirokastër, numri i efektivëve u rrit në 34, ndërsa një motopompë u vendos në lagjen Granicë për të pompëzuar ujërat.
Regjimenti i Këmbësorisë së Veriut po kontribuon me forca shtesë në operacionet e shpëtimit.
Në Durrës, efektivët arritën në 62 (nga 61), me 18 mjete (nga 17), 5 motopompa dhe 12 agregate për të mbështetur zonat e prekura.