Sipas të dhënave të kompanisë AirDNA, tregu i akomodimit afatshkurtër në Shqipëri mbetet thuajse tërësisht i orientuar drejt vizitorëve ndërkombëtarë. Gjatë 12 muajve të fundit, kërkesa nga shtetasit shqiptarë ka qenë shumë e kufizuar, duke bërë që 97% e netëve të qëndrimit të realizohen nga vizitorë të huaj.
Në strukturën e kërkesës për apartamente turistike, Franca zë vendin e parë me 18% të netëve të rezervuara. Trendi në rritje i turistëve francezë është konkretizuar këtë verë edhe përmes ardhjeve të organizuara dhe kontratave të garancisë në zonën e Golemit dhe Durrësit.
Pas Francës, tregjet kryesore që gjenerojnë kërkesë për qiratë afatshkurtra në vendin tonë janë:
- Gjermania: 14%
- Shtetet e Bashkuara: 12%
- Mbretëria e Bashkuar: 11%
- Holanda: 4%
Analiza historike tregon një ndryshim të dinamikave të tregut gjatë pesë viteve të fundit. Ndërsa pesha e turistëve nga vendet evropiane si Franca, Gjermania, Mbretëria e Bashkuar, Kanadaja dhe Holanda ka ardhur në rritje, interesi i vizitorëve nga Shtetet e Bashkuara ka shënuar një rënie graduale pas nivelit më të lartë të arritur në vitin 2021.