Sipas të dhënave të platformës AirDNA për 12-mujorin e përfunduar në mars 2026, Shqipëria kryeson rajonin e Europës Juglindore për sa i përket ritmit të zgjerimit të tregut të qirave ditore. Me një rritje prej 19.3% të ofertës, Shqipëria qëndron përpara vendeve të tjera të rajonit:
- Mali i Zi: 9.9%
- Rumania: 9.2%
- Serbia: 8.9%
- Sllovenia: 7.7%
- Bullgaria: 5.7%
Në aspektin e kapaciteteve, Shqipëria renditet e dyta në rajon me mesatarisht 27 mijë listime mujore, duke u pozicionuar pas Rumanisë, e cila kryeson me 32,828 listime. Pas Shqipërisë, lista vijon me Malin e Zi me 21,143 dhe Bullgarinë me 18,167 listime.
Edhe pse kërkesa ka shënuar rritje, duke arritur në 2.36 milionë net-qëndrime krahasuar me 2 milionë të një viti më parë, zgjerimi i ofertës e ka tejkaluar ritmin e kërkesës. Ky disbalanc ka ndikuar në normën mesatare të zënies, e cila ka zbritur në 53.9%, nga 54.5% që ishte në periudhën e mëparshme. Të ardhurat e gjeneruara nga ky treg në këtë periudhë 12-mujore arritën në rreth 133.7 milionë euro.
Analiza thekson se turizmi në vend mbetet ende thellësisht sezonal, me kërkesë të përqendruar kryesisht gjatë muajve të verës. Pavarësisht përpjekjeve për të garantuar një fluks gjithëvjetor, menaxhimi i kapaciteteve në raport me sezonalitetin mbetet sfida kryesore për këtë sektor.