Agjencia Europiane për Mbrojtjen e Kufijve, Frontex, ka publikuar të dhëna që tregojnë një rënie të ndjeshme të emigracionit të paligjshëm drejt Bashkimit Europian. Për periudhën janar-prill të këtij viti, numri i hyrjeve të parregullta ka arritur në rreth 29 mijë persona, duke shënuar një ulje prej 40% krahasuar me të njëjtën periudhë të vitit të kaluar. Ky është niveli më i ulët i viteve të fundit, ndërsa në vitin 2023 numri ishte afro tre herë më i lartë.
Rruga më e përdorur vazhdon të jetë ajo e Mesdheut Qendror, me nisje nga brigjet e Libisë drejt Italisë. Pas saj renditet rruga e Mesdheut Lindor, përmes Turqisë drejt Greqisë dhe Qipros. Secila prej këtyre rrugëve përbën afërsisht një të tretën e të gjitha hyrjeve të parregullta në territorin e BE-së.
Frontex e lidh këtë rënie me forcimin e bashkëpunimit mes Bashkimit Europian dhe vendeve partnere në Afrikën e Veriut. Në këmbim të mbështetjes financiare nga BE-ja, këto shtete kanë rritur kontrollet kufitare dhe kanë ndërmarrë masa kundër rrjeteve të trafikimit të emigrantëve. Gjithashtu, kushtet e pafavorshme atmosferike në muajt e parë të vitit kanë penguar tentativat për kalime detare të rrezikshme.
Megjithatë, situata në Mesdhe mbetet e rëndë për shkak të numrit të lartë të viktimave. Sipas Organizatës Ndërkombëtare për Migracionin, mbi 1.200 persona kanë humbur jetën në këtë det që nga fillimi i vitit.
Përditësime
Frontex publikoi të dhënat sipas të cilave hyrjet e parregullta drejt BE-së ranë me më shumë se 25% gjatë vitit 2025 krahasuar me vitin paraardhës. Të dhënat iu dhanë ekskluzivisht studios ARD në Bruksel.