Sipas edicionit më të fundit të raportit vjetor "Mind Health Report", përdorimi i inteligjencës artificiale për mbështetje psikologjike është në rritje, përballë niveleve të larta të ankthit, stresit dhe depresionit në nivel global. Sondazhi, i realizuar nga AXA dhe IPSOS midis 12 janarit dhe 16 shkurtit 2026 me 19,000 të rritur në 18 vende, zbuloi se ndërsa shumica i drejtohen teknologjisë për ndihmë, besueshmëria e këtyre platformave mbetet e diskutueshme.
Rreth 38% e të anketuarve deklarojnë se u besojnë chatbot-eve më shumë sesa profesionistëve të shëndetit mendor, ndonëse 45% e përdoruesve mbeten të pakënaqur nga cilësia e këshillave të ofruara.
Gjendja emocionale dhe të rinjtë
Nga të dhënat e publikuara, 46% e të anketuarve raportojnë vështirësi emocionale, ku ndjenja e trishtimit dhe humorit të rënduar është më e shpeshta, e raportuar nga 65% e pjesëmarrësve. Grupmosha 18-24 vjeç vijon të mbetet më e cënueshmja, ku 43% e tyre shfaqin nivele të rënda ose ekstreme të problemeve mendore, shifër kjo pothuajse dyfishi i mesatares globale prej 26%.
Ndikimi i teknologjisë
Ekspertët vënë në dukje se përdorimi i tepruar i teknologjisë lidhet ngushtë me mirëqenien e individit. Mesatarisht, njerëzit shpenzojnë 5.1 orë në ditë para ekraneve, një fakt që 66% e të anketuarve e pranojnë se ndikon negativisht në jetën e tyre të përditshme. Përdorimi i vazhdueshëm i ekraneve është shoqëruar me përkeqësim të cilësisë së gjumit, përqendrimit dhe zvogëlim të aktivitetit fizik, duke nxitur shqetësime për rritjen e izolimit social dhe vetmisë tek përdoruesit.