Një studim nga studiues të Universitetit të East Anglia në Angli nxori në pah nivele dezinformimi në postimet e rrjeteve sociale për shëndetin mendor dhe neurodivergjencën. Analiza përfshiu 27 studime me rreth 5.000 postime në platforma si YouTube, TikTok, Facebook, Instagram dhe X.
Deri në 56% e këtyre postimeve për tema si autizmi, ADHD, skizofrenia, çrregullimi bipolar, depresioni, çrregullimet e të ngrënit, çrregullimi obsesiv-kompulsiv (OCD), ankthi dhe fobi rezultuan të pasakta ose pa mbështetje në prova. Dezinformimi ishte më i lartë në postimet për neurodivergjencën, si autizmi dhe ADHD, krahasuar me çrregullimet e tjera të shëndetit mendor.
TikTok-u kishte nivele më të larta dezinformimi se platformat e tjera, me 52% të videove për ADHD dhe 41% për autizmin. Në krahasim, YouTube kishte mesatarisht 22% dezinformim, ndërsa Facebook pak më pak se 15%. Dezinformimi varionte nga 0% për videot mbi ankthin dhe depresionin në YouTube Kids deri në 56,92% për videot mbi klaustrofobinë nga MRI në YouTube.
Eleanor Chatburn, bashkautore e studimit, deklaroi se "puna jonë zbuloi nivele dezinformimi në rrjetet sociale deri në 56%. Kjo tregon se sa lehtë mund të përhapen gjerësisht videot tërheqëse në internet, edhe kur informacioni nuk është gjithmonë i saktë". Ajo vuri në dukje se mediat sociale janë burim kryesor informacioni për të rinjtë mbi shëndetin mendor, ku përmbajtja mashtruese qarkullon shpejt në mungesë të burimeve të besueshme.
Dr. Alice Carter nga i njëjti universitet lidh postimet e pasakta për ADHD dhe autizmin me rritjen e numrit të të rinjve që besojnë se kanë probleme neurozhvillimore. Studiuesit kërkojnë veprim për më shumë informacion cilësor dhe forcim të moderimit të përmbajtjes, duke theksuar rolin e moderimit të rreptë në YouTube Kids si shembull pozitiv.