Një qytetar që ishte shpallur i zhdukur është gjetur pa shenja jete mëngjesin e 15 shtatorit 2026 në fshatin Zajm të komunës së Klinës. Zëdhënësi i Policisë së Kosovës për rajonin e Pejës, Driton Rugova, konfirmoi se familjarët kishin raportuar zhdukjen në Stacionin Policor në Klinë rreth orës 02:35 të së njëjtës ditë, pasi personi nuk ishte përgjigjur në telefon që nga dita paraprake.
Pas ndërmarrjes së masave dhe një pune intensive nga njësitet policore, viktima është gjetur rreth orës 10:10. Ekipi mjekësor i pranishëm në vendin e ngjarjes ka konstatuar vdekjen e tij. Në vendin ku u gjet trupi, kanë dalë hetuesit nga Sektori Rajonal për Hetime i Drejtorisë Rajonale të Policisë në Pejë, si dhe prokurori i Shtetit.
Me urdhër të prokurorit, trupi i pajetë është dërguar në Institutin e Mjekësisë Ligjore në Prishtinë për kryerjen e obduksionit. Rasti është iniciuar si “Hetim i vdekjes” dhe autoritetet po vijojnë punën për zbardhjen e rrethanave të ngjarjes.
Përditësime
Policia e Kosovës konfirmoi identitetin e viktimës, i cili është shtetasi austriak Roman Rainer. Trupi i pajetë është gjetur në rrjedhën e lumit Drin, në afërsi të Klinës.