Gjykata e Posaçme ka shpallur vendimin për Artan Tafanin dhe Kristi Bixhekun, të akuzuar për vepra penale në kuadër të grupit të strukturuar kriminal të drejtuar nga Laert Haxhiu. Të dy të pandehurit janë dënuar përfundimisht me nga 2 vite e 4 muaj burg.
Kristi Bixheku u dënua fillimisht me 3 vite e 6 muaj burg, masë e cila u reduktua pas aplikimit të gjykimit të shkurtuar. Prokuroria e Posaçme (SPAK) kishte kërkuar një dënim më të lartë, megjithatë gjykata e shpalli të pandehurin të pafajshëm për disa episode të akuzës, përfshirë planifikimin e vrasjes së shtetasit Genci Hida në periudhën prill-maj 2023.
Ndërkohë, Artan Tafani, i cili mban statusin e bashkëpunëtorit të drejtësisë, u dënua fillimisht me 7 vite burg. Pas përfitimit nga gjykimi i shkurtuar, dënimi i tij u zbrit në 4 vite e 8 muaj, ndërsa në vijim, për shkak të statusit të tij, masa përfundimtare u caktua në 2 vite e 4 muaj burg. Tafani akuzohej ndër të tjera për sigurimin e kushteve për vrasjen e Rexhep Ginës në korrik të vitit 2022, në bashkëveprim me Laert Haxhiun dhe Fatjon Veliun.
Të pandehurit akuzoheshin për "shkatërrim të pronës me eksploziv", "sigurim të kushteve dhe mjeteve materiale për të kryer vrasje" dhe "grup të strukturuar kriminal".
Përditësime
Gjykata e Posaçme (GJKKO) ka lehtësuar pozitën ligjore të Kristi Bixhekut, duke e dënuar atë vetëm për akuzën e 'përkrahjes së autorit të krimit', ndërsa e ka shfajësuar për 'armëmbajtje pa leje', 'sigurim të kushteve për vrasje' dhe 'grup të strukturuar kriminal'. Në të njëjtin proces, Artan Tafani është dënuar me 2 vjet e 7 muaj burg. Gjykata bëri të ditur se kjo dosje është veçuar nga hetimi kryesor ndaj Laert Haxhiut.
GJKKO ka sqaruar sot qëndrimin ligjor për të pandehurit në procesin ndaj Artan Tafanit:
- Gjykata konfirmoi zyrtarisht identitetin e dyfishtë të Artan Tafanit, i njohur edhe si Marjus Tafani.
- Kristi Bixheku u shpall i pafajshëm për akuzat e 'grupit të strukturuar kriminal' dhe 'armëmbajtjes pa leje', duke u dënuar vetëm për 'përkrahje të autorit të krimit'.
- Palët kanë afat 15 ditë nga njoftimi i vendimit të arsyetuar për të ushtruar ankim në Apelin e GJKKO-së.