Gjykata e Apelit e Romës ka ngritur dyshime mbi ligjshmërinë e Protokollit Itali-Shqipëri për menaxhimin e emigrantëve, në bazë të të cilit u ndërtua qendra e pritjes në Gjadër. Në tre vendime të nxjerra gjatë muajit shkurt, gjykata refuzoi të shqyrtojë kërkesat për konfirmimin e ndalimit të migrantëve në këtë qendër, për shkak të dyshimeve mbi përputhshmërinë e protokollit dhe ligjit italian të ratifikimit me të drejtën e Bashkimit Evropian.
Gjykata thekson kontradiktën midis marrëveshjes dypalëshe dhe rregullave evropiane për azilin. Sipas normave në fuqi, kërkuesi i azilit ka të drejtë të qëndrojë në shtetin anëtar të BE-së deri në marrjen e vendimit mbi kërkesën e tij. Këto dyshime lidhen me një referim paraprak të paraqitur nga vetë Gjykata e Apelit e Romës më 5 dhe 17 nëntor 2025 pranë Gjykatës së Drejtësisë së Bashkimit Evropian.
Vendimet prekin rastet e tre shtetasve marokenë, të cilët u transferuan në qendrën e Gjadrit sipas mekanizmit të protokollit. Të tre kishin paraqitur kërkesë për mbrojtje ndërkombëtare, ndërsa mbi ta rëndonte urdhër dëbimi nga territori italian. Disa prej tyre kishin precedentë penalë, të vuajtur tashmë, për vepra si pjesëmarrje në organizata kriminale të lidhura me trafikun e drogës, dhunë seksuale dhe rezistencë ndaj autoritetit publik.
Gjykatësit italianë vlerësojnë se çështja kryesore nuk lidhet me profilin penal të personave, por me respektimin e të drejtave procedurale të kërkuesve të azilit sipas legjislacionit evropian. Kërkesa për konfirmimin e ndalimit në qendrën e qëndrimit për riatdhesim në Gjadër nuk mund të merret parasysh pa sqarim nga Gjykata e BE-së.