Gjykata e Apelit ka urdhëruar kthimin në rigjykim, për herë të dytë, të çështjes penale ndaj tre të akuzuarve Besart Mulaku, Kushtrim Krasniqi dhe Festim Krasniqi. Ata akuzohen se në bashkëkryerje kanë vënë zjarrin në restorantin Berlini, i cili ndodhet në magjistralen Ferizaj-Prishtinë, ngjarje e ndodhur gjatë vitit 2020.
Në procesin e fundit, Gjykata Themelore në Ferizaj kishte marrë një aktgjykim dënues më 26 dhjetor 2025, duke i dënuar secilin nga të akuzuarit me nga dy vite burgim. Mbrojtësit e të akuzuarve, avokatët Teuta Zhinipotoku, Fitim Malokaj dhe Arsim Bilali, kishin parashtruar ankesa duke pretenduar shkelje procedurale dhe vërtetim të gabuar të gjendjes faktike.
Sipas vendimit të Gjykatës së Apelit, në shkresat e lëndës u konstatuan shkelje esenciale të dispozitave të procedurës penale. Problemi kryesor qëndron te fakti se gjyqtarja e procedurës paraprake, Hakile Ilazi, e cila kishte urdhëruar sekuestrimin e provave materiale në fazën fillestare, më pas e ka gjykuar rastin si gjyqtare e vetme në shkallë të parë. Apeli vlerësoi se, për shkak të përfshirjes në fazën e mëparshme, gjyqtarja duhej të përjashtohej nga shqyrtimi i çështjes.
Kolegji i Gjykatës së Apelit, i përbërë nga Nikoll Komani (kryetar), Ali Kutllovci dhe Mehmet Ndrecaj (anëtarë), ka udhëzuar gjykatën e shkallës së parë që në rigjykim të evitojë shkeljet ligjore të evidentuara. Për shkak të anulimit të aktgjykimit mbi baza procedurale, gjykata e shkallës së dytë nuk i ka shqyrtuar pretendimet e tjera ankimore. Kjo është hera e dytë që çështja kthehet në rigjykim, pasi një vendim i ngjashëm u mor edhe nga Apeli më 3 mars 2023.