Gjykata e Shkallës së Parë e Juridiksionit të Përgjithshëm Fier ka caktuar masën e sigurisë “Arrest në burg” për Madrid Sulën, 60-vjeç nga fshati Thanasaj i Lushnjës. Ai akuzohet se i ka dërguar mesazhe me përmbajtje erotike dhe seksuale një nxënëseje të mitur 13-vjeçare, duke komunikuar në mënyrë të papërshtatshme me të.
Sipas hetimeve, e mitura, e cila kishte shfaqur rëndesë psikologjike, ua ka treguar fillimisht prindërve komunikimet në fjalë. Pas denoncimit të bërë nga prindërit pranë Policisë së Lushnjës dhe administrimit të mesazheve, efektivët proceduan me arrestimin e mësuesit. Seanca gjyqësore, e cila u zhvillua me dyer të mbyllura, vlerësoi të ligjshëm arrestimin në flagrancë të 60-vjeçarit.
Prokurori i çështjes, Skerdi Sinanaj, paraqiti provat e administruara përpara gjyqtarit Noel Veizi, i cili miratoi kërkesën e prokurorisë për caktimin e masës së sigurimit personal. Ndaj të pandehurit rëndojnë akuzat për tri vepra penale, të parashikuara nga Kodi Penal:
• “Ngacmim seksual”
• “Shpërdorim detyre”
• “Pornografi”
Palët kanë të drejtë të bëjnë ankim kundër vendimit në Gjykatën e Apelit të Juridiksionit të Përgjithshëm brenda afatit prej 5 ditësh, duke filluar nga dita e nesërme e komunikimit të vendimit të arsyetuar. Çështja mbetet nën hetim nga Prokuroria e Fierit në bashkëpunim me Policinë Gjyqësore.