Gjykata e Hagës mori vendim më 28 korrik 2026 për vazhdimin e masës së paraburgimit ndaj ish-pjesëtarit të Ushtrisë Çlirimtare të Kosovës, Rexhep Selimi. Në vendimin e saj, trupi gjykues konstatoi se vazhdojnë të ekzistojnë rreziqe lidhur me ndërhyrjen në procesin gjyqësor dhe mundësinë e kryerjes së veprave të tjera penale.
Në të njëjtën kohë, gjykata rrëzoi pretendimin e Zyrës së Prokurorit të Specializuar lidhur me rrezikun e arratisjes. Në arsyetimin e saj, trupi gjykues vlerësoi se vazhdimi i paraburgimit në këtë fazë nuk mund të justifikohet mbi bazën e rrezikut të arratisjes, siç parashihet në nenin 41(6)(b). Gjykata theksoi gjithashtu se Rexhep Selimi mbetet një figurë me ndikim në Kosovë dhe se lirimi i tij nuk është i mundur, edhe për shkak të informacioneve që ai zotëron si rezultat i procesit të gjykimit.
Duke qenë se shpallja e aktgjykimit të shkallës së parë është planifikuar për datën 16 shtator 2026, trupi gjykues ka udhëzuar palët që të mos përgatisin parashtresa të tjera për rishikimin e masës së paraburgimit në këtë periudhë. Mbrojtja e Rexhep Selimit është udhëzuar të dorëzojë një version publik të redaktuar të njoftimit për heqjen dorë nga rishikimi i paraburgimit, ose kërkesën për riklasifikim, deri më 21 gusht 2026.
Rexhep Selimi po gjykohet në Hagë së bashku me ish-krerët e tjerë të UÇK-së, Hashim Thaçi, Kadri Veseli dhe Jakup Krasniqi, për akuza që lidhen me krime lufte dhe krime kundër njerëzimit. Gjykata ka sqaruar se rishikimi i ardhshëm i paraburgimit është caktuar në parim për 28 shtator 2026, përveç nëse ndërkohë publikohet aktgjykimi i çështjes.