Gjykata e Lartë ka vendosur të prishë vendimin e datës 26 tetor 2022 të Gjykatës së Apelit të Juridiksionit të Përgjithshëm, i cili e kishte shpallur Ergys Kolaverin të pafajshëm për atentatin me snajper ndaj Gazmir Dacit. Çështja është kthyer për rishqyrtim në të njëjtën gjykatë, e cila duhet të formojë një trupë të re gjykuese për të analizuar sërish provat dhe rrethanat e ngjarjes. Vendimi u mor nga një trupë penale e kryesuar nga gjyqtari Sandër Simoni.
Ngjarja për të cilën akuzohet Kolaveri daton më 30 korrik 2016, kur një snajper qëlloi nga një kodër e jashtme drejt mjediseve të ajrimit në burgun e Vaqarrit. Plumbi nuk e goditi shënjestrën, Gazmir Dacin, por plagosi të burgosurin Lili Dulaj. Sipas hetimeve të ish-Prokurorisë së Krimeve të Rënda, atentati u organizua për motive gjakmarrjeje, pasi Daci ishte i dënuar për vrasjen e Valmir Kolaverit dhe plagosjen e Robert Kolaverit, vëllezër të të akuzuarit.
Në nëntor të vitit 2017, Ergys Kolaveri u dënua nga Gjykata e Krimeve të Rënda me 20 vite burg për veprat penale "Vrasje për gjakmarrje e mbetur në tentativë", "Plagosje e rëndë me dashje", "Mbajtje pa leje dhe prodhim i armëve, armëve shpërthyese dhe municionit" dhe "Prodhimi, mbajtja, blerja ose shitja pa leje e armëve të ftohta". Pas një serie procesesh gjyqësore dhe ndryshimesh të kompetencave lëndore, në janar të vitit 2020 ai u la në masën e arrestit shtëpiak, ndërsa në vitin 2022 Apeli e shpalli atë të pafajshëm. Gjatë gjykimit, Kolaveri ka mohuar akuzat duke pretenduar se në kohën e ngjarjes ndodhej në një lokal dhe se nuk ka lidhje me atentatin.
Përditësime
Trupi gjykues i kryesuar nga gjyqtari Sandër Simoni vendosi në dhomë këshillimi prishjen e vendimit të Gjykatës së Apelit. Kolegji penal sqaroi se atentati me snajper ndaj Gazmir Dacit ndodhi më 30 korrik 2016.