Gjykata e Posaçme ka lënë në fuqi masën e sigurisë "arrest në burg" për Sajmir Kolaverin, pas ekstradimit të tij nga Italia drejt Shqipërisë. Kolaveri ishte shpallur në kërkim ndërkombëtar për vrasjen dhe zhdukjen e kufomës së Klevis Lleshit, ngjarje e ndodhur në vitin 2020 në Burrel.
Sipas akuzave, i pandehuri përballet me dyshime për veprat penale:
• Vrasje për gjakmarrje
• Fshehja ose asgjësimi i kufomës
• Grup i strukturuar kriminal
• Kryerja e veprave penale nga grupi i strukturuar kriminal
• Organizata kriminale
Autoritetet bëjnë me dije se Kolaveri është familjar i Aurel Hoxhës. Ky i fundit vijon të mbetet në kërkim, pasi dyshohet si urdhëruesi i vrasjes së Klevis Lleshit. Procedurat hetimore për zbardhjen e plotë të rrethanave të ngjarjes janë duke vijuar.
Përditësime
Gjatë seancës së sotme në GJKKO, Sajmir Kolaveri ka mohuar zyrtarisht akuzat, duke deklaruar para trupit gjykues se nuk ka asnjë lidhje me ngjarjen për të cilën akuzohet.