Gjykata e Lartë ka dhënë vendim përfundimtar në çështjen ligjore midis ish-kreut të Policisë së Shtetit, Gledis Nano, dhe Këshillit të Ministrave si dhe Ministrisë së Punëve të Brendshme. Gjykata ka lënë në fuqi vendimet e shkallëve të mëparshme dhe ka rrëzuar rekursin e paraqitur nga qeveria.
Vendimi konfirmon se shkarkimi i Gledis Nanos me vendimin nr. 580 të datës 31 gusht 2022 të Këshillit të Ministrave ka qenë i paligjshëm. Nano u emërua në krye të Policisë së Shtetit dhe u shkarkua pas gati 11 muajsh në detyrë nga kryeministri dhe ministri i atëhershëm Blendi Çuçi.
Në bazë të çështjes është kërkesa e Nanos për shfuqizimin e vendimit të shkarkimit dhe trajtimin me pagë deri në përfundim të mandatit 5-vjeçar, ose sistemimin në struktura të tjera të Policisë së Shtetit. Kjo përkthehet në pagesën e 60 rrogave, me vlerë rreth 100 mijë euro.
Shkallët e tjera të gjyqësorit kishin dhënë të drejtë Nanos më parë, ndërsa Gjykata e Lartë ka refuzuar pretendimet e Këshillit të Ministrave dhe Ministrisë së Punëve të Brendshme.