Gjykata e Lezhës ka vendosur masën e sigurisë arrest në shtëpi për 32-vjeçarin Fatjon Rrika, i arrestuar si i dyshuar për vendosjen e lëndës plasëse në automjetin e agjentit të krimeve Gentjan Gjeta.
Ngjarja ndodhi të dielën në lagjen Besëlidhja të Lezhës, ku shpërthimi shkaktoi dëme materiale në automjet.
Sipas hetuesve, mungesa e kamerave sigurie pranë vendit të ngjarjes çoi në zgjerimin e rrethit të vëzhgimit te kamerat e bizneseve të afërta. Aty u identifikua një motor i dyshimtë që lëvizte në zonë para dhe pas shpërthimit. Policia identifikoi Rrikën, i cili u arrestua në fshatin Zhejë të Kurbinit teksa drejtonte të njëjtin motor.
Burime bëjnë me dije se kamerat regjistruan edhe një person të dytë në motor me të dyshuarin, i cili ende nuk është identifikuar dhe shpallur në kërkim. Grupi hetimor dyshon se Rrika mund të jetë paguar nga persona të tjerë.
Gjatë arrestimit dhe seancës gjyqësore, 32-vjeçari nuk ka pranuar lidhje me ngjarjen.
Policia raporton se Fatjon Rrika ka precedentë penalë në Itali për vjedhje me armë. Në gjendje të lirë, hetimi është nisur ndaj babait të tij, 66-vjeçar, pasi në banesën e tyre u gjet një armë gjahu pa leje.
Hetimet vazhdojnë për zbardhjen e plotë të rrethanave.