Gjykata Evropiane e të Drejtave të Njeriut (GJEDNJ) ka vendosur në favor të ish-prokurorit të Krimeve të Rënda, Gentian Osmani, duke e vlerësuar shkarkimin e tij nga detyra si një masë joproporcionale. Sipas vendimit, procesi i vlerësimit ndaj Osmanit ka shkelur nenin 8 të Konventës Evropiane për të Drejtat e Njeriut, i cili mbron të drejtën për respektimin e jetës private.
Osmani, i cili në kohën e shkarkimit ishte anëtar i Këshillit të Lartë të Prokurorisë (KLP), u largua nga sistemi i drejtësisë në korrik të vitit 2019 nga Kolegji i Posaçëm i Apelimit (KPA). Ky vendim erdhi pas ankimit të Komisionerit Publik ndaj vendimit fillestar të Komisionit të Pavarur të Kualifikimit (KPK), i cili e kishte konfirmuar prokurorin në detyrë.
Sipas gjykatës ndërkombëtare, mospërputhjet e konstatuara në procesin e vettingut lidheshin vetëm me mënyrën e pasqyrimit të kursimeve familjare në deklaratat e viteve 2011 dhe 2013. Strasburgu theksoi se nuk u identifikuan pasuri të fshehura apo burime financiare të paligjshme. Për më tepër, gjykata vuri në dukje se bashkëshortja e prokurorit, e cila kishte të njëjtën situatë financiare, ishte konfirmuar në detyrë, pa pasur një shpjegim bindës nga autoritetet shqiptare për këtë trajtim të ndryshëm.
Si pjesë e vendimit, shteti shqiptar është urdhëruar të paguajë 6 mijë euro dëmshpërblim për dëmin jopasuror dhe 5 mijë euro për shpenzimet gjyqësore. Gjykata ka hapur mundësinë që, nëse Gentian Osmani e kërkon, çështja të rishqyrtohet në përputhje me standardet e konventës.
Përditësime
Gjykata Evropiane për të Drejtat e Njeriut (GJEDNJ) ka zgjeruar listën e vendimeve në favor të subjekteve të shkarkuara nga procesi i vetingut. Pas rastit të Gentian Osmanit, Gjykata identifikoi dy raste të tjera të ngjashme, përkatësisht të ish-prokurorit të Apelit të Durrësit dhe ish-kryetarit të Gjykatës së Pukës. Sipas GJEDNJ-së, ndëshkimet për këta ish-magjistratë ishin joproporcionale, duke shkaktuar pasoja të rënda në jetën e tyre private dhe profesionale.