Gjykata Evropiane e të Drejtave të Njeriut (GJEDNJ) shpalli vendimin për çështjen e ish-prokurorit Adnand Kosova, duke konfirmuar se procesi i shkarkimit të tij ishte në kundërshtim me standardet e Konventës Evropiane për të Drejtat e Njeriut. Strasburgu vlerësoi se autoritetet shqiptare nuk paraqitën arsye relevante dhe të mjaftueshme për të justifikuar ndërhyrjen në jetën private të tij, duke e cilësuar shkarkimin si joproporcional.
Adnand Kosova, një prokuror me karrierë të gjatë që prej vitit 1986, ishte konfirmuar fillimisht në detyrë nga Komisioni i Pavarur i Kualifikimit (KPK) më 20 dhjetor 2018. Megjithatë, më 13 mars 2020, Kolegji i Posaçëm i Apelimit (KPA) e ndryshoi vendimin dhe e shkarkoi atë për çështje që lidheshin me kriterin e pasurisë, konkretisht për shitjen e një apartamenti në Korçë në vitin 2002. Gjykata e Strasburgut vërejti se KPA kishte ndjekur një qasje tepër formale, duke mos marrë parasysh rrethanat specifike të periudhës përpara hyrjes në fuqi të ligjit të vitit 2003 për deklarimin e pasurive.
Ndonëse organet e vettingut kanë përfunduar mandatet e tyre, GJEDNJ iu referua Nenit 179/b, paragrafi 8, të Kushtetutës së Shqipërisë, duke sugjeruar se procedura mund të rihapet dhe çështja të rishqyrtohet në përputhje me kërkesat e Nenit 8. Për këtë shkelje, Shqipëria detyrohet të dëmshpërblejë ish-prokurorin me një total prej 11 mijë eurosh (6 mijë euro dëm jomaterial dhe 5 mijë euro shpenzime gjyqësore).