Gjykata e Shkallës së Parë të Juridiksionit të Përgjithshëm në Tiranë ka vendosur zëvendësimin e masës së sigurimit të datës 5 qershor 2026, duke hequr çdo kufizim për administrimin e shoqërisë VIA nga ortaku mazhoritar, MABCO.
Vendimi vjen pas një përplasjeje të gjatë ligjore. Biznesmeni Behgjet Pacolli deklaroi se gjykata u bazua në arsyetimin e një vendimi të mëparshëm të Gjykatës së Lartë, që i kishte njohur MABCO-s të drejtën për të administruar shoqërinë. Sipas Pacollit, masa e mëparshme e sigurimit kishte penguar mbajtjen e Asamblesë së VIA-s, të planifikuar për datën 6 qershor 2026, duke bllokuar ndryshimin e administratorit dhe aksesin në kantierin e Aeroportit të Vlorës.
Kompania MABCO kishte kallëzuar më herët gjyqtaren Miranda Nakaj në SPAK, duke pretenduar se vendimet e saj ishin në kundërshtim me ligjin dhe vendimet e shkallëve më të larta gjyqësore, duke shkaktuar vonesa të konsiderueshme në punime.
Në një reagim pas vendimit, Pacolli u bëri thirrje institucioneve shtetërore, përfshirë Ministrinë, Avokaturën e Shtetit dhe Policinë e Shtetit, të garantojnë zbatimin e këtij vendimi. Ai theksoi se synimi i kompanisë është përshpejtimi i punimeve për përfundimin e infrastrukturës së aeroportit, projekt të cilin e cilësoi si me interes publik.