Gjykata Kushtetuese ka vendosur të pranojë pjesërisht kërkesën e kryetarit të Partisë Demokratike, Sali Berisha, lidhur me masën e sigurisë "detyrim për paraqitje". Vendimi, i cili është marrë me shumicë votash, shfuqizon vendimin e Kolegjit Penal të Gjykatës së Lartë të datës 22 prill 2025, duke e vlerësuar atë si të papajtueshëm me Kushtetutën. Për rrjedhojë, çështja kthehet për rishqyrtim në Gjykatën e Lartë, ndërsa shpenzimet e përfaqësimit ligjor të Sali Berishës, në vlerën 60 mijë lekë, i janë ngarkuar Ministrisë së Financave.
Sipas arsyetimit të Gjykatës Kushtetuese, masa e sigurisë në fjalë ndërhyn në lirinë e lëvizjes, të garantuar nga neni 38 i Kushtetutës. Gjykata vlerësoi se instancat e mëparshme nuk u kishin dhënë përgjigje shteruese pretendimeve lidhur me nevojën dhe përshtatshmërinë e kësaj mase shtrënguese. Megjithatë, trupa gjykuese theksoi se pretendimet e tjera të Sali Berishës për cenimin e së drejtës për proces të rregullt ligjor kishin marrë përgjigje nga gjykatat e juridiksionit të zakonshëm dhe nuk u vlerësuan si arbitrare.
Është sqaruar se ky vendim nuk nënkupton shfuqizimin automatik të masës së sigurisë ndaj Berishës, por detyron Gjykatën e Lartë që ta rishqyrtojë çështjen duke mbajtur parasysh vërejtjet e Gjykatës Kushtetuese. Sali Berisha ndodhet nën proces gjyqësor në Gjykatën e Posaçme për çështjen e privatizimit të kompleksit Partizani, ku akuzohet për "korrupsion" në cilësinë e ish-kryeministrit.
Përditësime
Gjykata Kushtetuese urdhëroi Ministrinë e Financave të rimbursojë shpenzimet ligjore të Sali Berishës dhe rrëzoi pretendimet e tjera për proces të parregullt.