Gjykata Kushtetuese ka zbardhur vendimin për kërkesën e Sali Berishës lidhur me masën e arrest shtëpiak. Gjykata ka vendosur se zgjatja e kësaj mase ndaj kreut të Partisë Demokratike është antikushtetuese dhe e tejzgjatur.
Avokatët e Berishës e kundërshtuan qëndrimin e SPAK-ut për vazhdimin e arrestit shtëpiak gjatë raporteve dy mujore. Kjo masë u kthye në detyrim paraqitje në janarin e 2025-s.
Gjykata Kushtetuese arsyeton se, pavarësisht shtatë muajve nga vendosja e masës, gjykatat e ulëta nuk kanë dhënë argumente konkrete për rrezik ikjeje. Gjithashtu, nuk janë paraqitur rrethana të reja për ashpërsimin e masës së sigurisë.
Rrethanat e çështjes
- Sali Berisha është deputet i Kuvendit, drejtues i PD-së, ish-president dhe ish-kryeministër.
- Procedimi penal nr. 287/2020 u regjistrua nga Prokuroria e Posaçme kundër Korrupsionit dhe Krimit të Organizuar (SPAK) në bazë të kallëzimit të T.B., ish-kryetar i grupit parlamentar të partisë në pushtet.
- Akuzat fillestare: "Pastrimi i produkteve të veprës penale ose veprimtarisë kriminale" (neni 287 i Kodit Penal), lidhur me kthimin e pronës te 5 familje ish-pronare, privatizimin e objekteve të ish-klubit sportiv Partizani, ndryshimin e destinacionit dhe zhvillimin e pronës.
- Me urdhrin e 2 tetor 2023, Berisha u regjistrua si i dyshuar për "Korrupsioni pasiv i funksionarëve të lartë shtetërorë ose i të zgjedhurve vendorë" (nenet 260 dhe 25 të Kodit Penal), në bashkëpunim me J.M. dhe F.B., për sjellje gjatë ushtrimit të funksionit të kryeministrit pas vitit 2005.