Gjykata në Serbi vendosi lirimin e menjëhershëm të katër shqiptarëve të ndaluar për publikimin e një videoje në rrjetet sociale. Ata do të hetohen në gjendje të lirë për akuzën e nxitjes së urrejtjes kombëtare, racore dhe fetare. Lajmin e bëri të ditur Taulant Balla, kreu i Grupit Parlamentar të Partisë Socialiste, përmes një postimi në Facebook.
Sipas autoriteteve serbe, videoja u publikua nga A. S. në Facebook, ku shfaqen katër personat duke udhëtuar me një automjet tip Audi në një autostradë serbe. Në video, ata vishnin bluzë me mbishkrimin "Shqipëri Etnike", çka u konsiderua si nxitje urrejtjeje.
Të ndaluarit identifikohen si:
- A. S., 37 vjeç;
- E. V., 42 vjeç;
- E. G., 48 vjeç;
- A. C., 18 vjeç.
Të katër akuzohen për të njëjtën vepër penale. Vendimi i gjykatës erdhi pas ndalimit të tyre nga Policia serbe.
Përditësime
Taulant Balla deklaroi: "Katër djemtë shqiptarë të ndaluar në Serbi do të lirohen menjëherë dhe hetohen më pas në gjendje të lirë. Ky është vendimi i gjykatës serbe." Videoja përfshinte këngë patriotike dhe gjestin e shqiponjës me duar.