Gjykata Supreme e Kosovës ka vendosur të mos e marrë në shqyrtim padinë e ngritur nga Qeveria e Republikës së Kosovës, përmes Ministrisë së Drejtësisë, lidhur me lartësinë e shpenzimeve të regjistrimit në Odën e Avokatëve të Kosovës (OAK). Padia ishte dorëzuar nga Avokatura Shtetërore më 12 qershor 2026, ndërsa pas një kërkese për qartësim nga ana e gjykatës, Ministria e Drejtësisë kishte dorëzuar një parashtresë plotësuese më 18 qershor 2026.
Në arsyetimin e saj, Gjykata Supreme thekson se akti që Ministria e Drejtësisë kërkonte të shfuqizonte, përkatësisht dokumenti "Kërkesa për regjistrim në regjistrin e avokatëve", nuk plotëson kriteret për t'u kualifikuar si akt nënligjor normativ. Sipas gjykatës, ky dokument nuk është nxjerrë në bazë të autorizimit të shprehur të një ligji të miratuar nga Kuvendi, kusht ky thelbësor për shqyrtimin e drejtpërdrejtë nga kjo instancë.
Duke iu referuar nenit 10, paragrafi 4 të Ligjit për Konfliktet Administrative (LKA), Gjykata Supreme shpjegoi se kompetenca e saj kufizohet ekskluzivisht në shqyrtimin e revizioneve kundër aktgjykimeve të shkallës së dytë dhe padive për shfuqizimin e akteve nënligjore normative që paraqiten drejtpërdrejt në këtë gjykatë. Pasi konstatoi se dokumenti i kontestuar nuk hyn në kategorinë e akteve nënligjore normative, gjykata e vlerësoi padinë si të palejuar dhe jashtë fushës së kompetencës së saj lëndore.