Gjykata Kushtetuese e Republikës së Kosovës ka konstatuar shkelje të së drejtës për gjykim të drejtë dhe të paanshëm, të garantuar me nenin 31 të Kushtetutës dhe nenin 6 të Konventës Evropiane për të Drejtat e Njeriut, në lidhje me një kontest për tregun e lirë të energjisë elektrike. Në vendimin e saj unanim, gjykata ka shpallur të pavlefshëm Aktvendimin e Gjykatës Supreme [P.A. nr. 24/2025] të datës 15 shtator 2025 dhe e ka kthyer çështjen për rivendosje.
Çështja, e parashtruar nga subjekti Fidan Muhaxhiri Biznes individual dhe e përfaqësuar nga Zyra Ligjore Basha Kraja LLC, lidhet me një padi kundër Zyrës së Rregullatorit për Energji (ZRRE). Paditësi kishte kontestuar ligjshmërinë e një udhëzuesi të nxjerrë nga ky institucion, i cili detyronte operatorët ekonomikë të kalonin nga shërbimi universal i furnizimit me energji në tregun e lirë.
Gjykata Supreme fillimisht e kishte hedhur poshtë padinë si të palejueshme, duke argumentuar se udhëzuesi kishte karakter thjesht informativ dhe nuk përbënte akt juridik të kontestueshëm. Megjithatë, Gjykata Kushtetuese vlerësoi se ky qëndrim ishte tepër formalist. Sipas aktgjykimit, gjykatat kanë për detyrë të vlerësojnë efektet reale juridike që një akt prodhon në praktikë, pavarësisht nga emërtimi apo forma e tij.
Parashtruesi i kërkesës pretendonte se udhëzuesi në fjalë ka devijuar nga dispozitat e Ligjit për Energji Elektrike, konkretisht neni 37.2, i cili përcakton kriteret për furnizimin universal. Gjykata Kushtetuese theksoi se Gjykata Supreme duhej të kishte shqyrtuar nëse përmbajtja e këtij udhëzuesi ka ndikuar negativisht në të drejtat dhe interesat ekonomike të operatorëve, duke cenuar kështu qasjen efektive në gjykatë.