Gjykata Themelore në Prishtinë ka njoftuar se ka caktuar seancat e shqyrtimit gjyqësor në çështjen penale ndaj Grujica Veljoviqit, i akuzuar për veprën penale krime të luftës kundër popullsisë civile.
Gjykimi do të zhvillohet në mungesë të të akuzuarit, sipas propozimit të Prokurorisë Speciale. Kjo sepse Veljoviqi ka qenë i paarritshëm për organet e drejtësisë.
Akuzata është e paraparë fillimisht me ligjin penal të ish-RSFJ-së, e që aktualisht është e inkriminuar si krime kundër njerëzimit sipas Kodit Penal të Republikës së Kosovës.
Përmes një komunikate zyrtare, gjykata i ka bërë thirrje Grujica Veljoviqit të dorëzohet pranë organeve kompetente në Kosovë.