Gjykata Themelore në Prishtinë, Departamenti Special, ka caktuar për 21 dhjetor 2026, në orën 09:30, seancën e shqyrtimit fillestar në mungesë ndaj 20 personave të akuzuar për krime lufte kundër popullsisë civile. Seanca do të mbahet në Pallatin e Drejtësisë në Hajvali, në objektin D, në katin e parë, në sallën nr. 27. Trupin gjykues do ta kryesojë gjyqtari Leon Përlaska.
Çështja penale, me numër PS.nr.46/2026, lidhet me aktakuzën e Prokurorisë Speciale të Republikës së Kosovës, me numër PPS.nr.25/2025, të ngritur më 6 gusht 2026. Të pandehurit akuzohen për veprën penale “Krime lufte kundër popullsisë civile”, sipas nenit 142, në lidhje me nenin 22 të Ligjit Penal të ish-Republikës Socialiste Federative të Jugosllavisë.
Sipas njoftimit të gjykatës, gjykimi do të zhvillohet në mungesë, pasi të pandehurit kanë qenë të paarritshëm deri në momentin e ngritjes së aktakuzës. Gjykata u ka bërë thirrje që të paraqiten dhe të dorëzohen para organeve të ndjekjes së Republikës së Kosovës. Personave që kanë informacione për vendndodhjen e tyre u është kërkuar t’i përcjellin ato te Policia e Kosovës ose te organet e tjera kompetente.
Të pandehurit janë Milovan Kovačevič, Radomir Čolić, Miloš Đošan, Predrag Ristić, Srđan Kristič, Ljubiša Obradovič, Živko Sarič, Spaso Sarić, Lazar Drašković, Zvonko Rištić, Darko Gligorijevič, Čedomir Božović, Vladimir Božović, Robert Dobruna, Radomir Raković, Ljubiša Raković, Miloš Ščepanović, Milan Radoičić, Svetislav Gligorijevič dhe Tomica Avramović.