Gjykata Themelore e Prishtinës – Departamenti Special ka njoftuar opinionin publik dhe mediat për caktimin e seancave të shqyrtimit gjyqësor në çështjen penale PS.nr.109/24.
Çështja ka për objekt aktakuzën PPS.nr.65/2022, të ngritur më 23 dhjetor 2024 nga Prokuroria Speciale e Republikës së Kosovës, kundër Grujica Veljoviqit, me adresë të panjohur të vendbanimit.
I akuzuari dyshohet për veprën penale "Krime të luftës kundër popullsisë civile", sipas nenit 142 lidhur me nenin 22 të Ligjit Penal të ish-Republikës Socialiste Federative të Jugosllavisë. Kjo vepër aktualisht inkriminohet si "Krime kundër njerëzimit", sipas nenit 143, paragrafi 1, nënparagrafët 1.6 dhe 1.7, lidhur me nenin 31 të Kodit Penal të Republikës së Kosovës.
Sipas propozimit të Prokurorisë Speciale, gjykimi do të zhvillohet në mungesë të të akuzuarit, pasi ai është i paarritshëm për organet e drejtësisë.
Përmes këtij njoftimi, Gjykata Themelore e Prishtinës i bën thirrje Grujica Veljoviqit të paraqitet dhe të dorëzohet para organeve të ndjekjes së Republikës së Kosovës. Gjithashtu, u kërkohet të gjithë personave që posedojnë informacione relevante për vendndodhjen e tij t’i komunikojnë këto te Policia e Kosovës ose organet e tjera kompetente.
Seancat do të mbahen në Pallatin e Drejtësisë, Hajvali, sallën D17, më 29 prill 2026 dhe 30 prill 2026, duke filluar nga ora 09:30. Procesi gjyqësor do të udhëhiqet nga kryetari i trupit gjykues, Kushtrim Shyti.
Aktakuza dhe ftesat për seancë janë publikuar në faqen zyrtare të gjykatës dhe në Gazetën Zyrtare të Republikës së Kosovës.